優質貓糧選擇

好多人都聽過貓貓嘅祖先係來自中東沙漠嘅野生利比亞山貓，佢地係一種肉食動物而且必須由食物中攝取水分。咁其實我哋而家餵緊嘅貓糧營養成份夠唔夠佢哋所需呢？等我哋嚟睇下喺選擇貓糧嘅時候要注意嘅地方啦！

動物性蛋白質

肉食性嘅貓貓同雜食性嘅狗狗有非常唔同嘅營養需求，貓貓必須由肉類或動物內臟中獲取動物性蛋白質。由於貓貓缺乏特定嘅消化酵素，消化系統無法有效分解植物蛋白。成分食材如穀類、粟米、大豆、蔬菜等並非貓貓嘅必需食材。所以喺選擇貓糧嘅時候，首先要考慮當中嘅動物性蛋白質含量與及蛋白質來源，並唔可以單睇標籤上蛋白質嘅總百分比而武斷決定是否屬於合適嘅貓糧。

碳水化合物

貓貓係天生嘅肉食者，佢哋喺生理上消化同埋利用碳水化合物嘅能力比較差，所以貓貓本身並唔需要由食物之中攝取碳水化合物，貓貓獲得充足營養嘅來源為高蛋白、水分豐富及含有適量脂肪嘅肉質食材。相反，太多嘅碳水化合物會影響佢哋吸收蛋白質嘅效率，更有可能因此導致肥胖、糖尿病等問題。

脂肪質

除咗蛋白質之外，貓貓需要利用食物中嘅脂肪質嚟提供身體所需能量，亦需要透過脂肪來儲存多種脂溶性維他命（A, D, E, K）。其中兩種脂肪酸－Omega-6 與及 Arachidonic Acid 更係貓貓不可或缺而且無法由體內自行合成嘅營養素，所以一般嘅貓糧標籤上面都會見到脂肪質數據

由食物中攝取水分

水係維持身體健康嘅必要元素，成年貓貓每日每公斤體重需要 40 c.c. 至 60 c.c. 水分以有效避免泌尿道、腎臟、肝臟等各方面疾病。但普遍而言貓貓並唔鍾意飲水，即使會主動飲水，飲水量都唔足夠。所以我哋作為主人除咗要經常為貓貓換水保持水質清潔之外，亦可以選擇餵飼水份相對高嘅罐頭罐頭，甚至將額外淨水加到罐頭之中以增加貓貓由食物中攝取得到嘅水分。